على الغالي دور

يا ناصح يللي تتباهى بزكاءك
مش كل اللي بلمع دهب
ولا كل الجواهر معروضالك
بُص كويس يمكن تشوف إيه اللي أُدامك

الدنيا ديه فترينة
فيها الناس متزوءالك
اشي أصفر....اشي أبيض
وأشياء جميلة .... بكل الألوان متلونالك

بس حاسب يا بني...ومتتغرش
الفترينة ديه ليك....ولكل أصحابك
الرخيص فيها معروض
والغالي مداري بعيد عن أنظارك

دور على تاجر ما يغشش
ويديك جوهرة متخبية بس عشانك
شايلها في خزنة
ومفتاحها- إن كنت شاطر- يمكن يبأ من املاكك

بس اعرف يا بني
طريأك طويلة ويمكن تكون بالأشواك مزروعالك

حتتعب شوية
لكن إن وصلت، ده طاءة القدر بئت مفتوحالك

ده كنز علي بابا بين ايديك
أكيد الست الوالدة كانت دايما دعيالك!!

فابسط يا عم وعلى الكنز حافظ
وشوف ازاي حتتغير حياتك
ده انت الغالي اخترت
فيا عم....هنيالك

أما إن كنت ع الرخيص دورت
فتستاهل كل اللي يجرالك!!